‘एक घर, एक धारा’ योजनाले गलकोट नगरपालिका–११ रिघाफेदीमा खानेपानीको सङ्कट टार्ने भएको छ । फेदी छरछरे खानेपानी आयोजनामार्फत रिघाफेदीका ५५ घरधुरीमा स्वच्छ खानेपानी पु¥याउन लागिएको हो ।
आयोजनाको ७० प्रतिशत काम पूरा भएको उपभोक्ता समितिका अध्यक्ष चित्रबहादुर राना कुमालले बताए । “यो वर्ष आयोजना पूरा हुन्छ,” उनले भने, “सबै घरधुरीमा धारा पुग्छ ।”
बुहवर्षीय योजनाअन्तर्गत अघिल्लो आवमा शुरु गरिएको आयोजनालाई गण्डकी प्रदेश सरकारले ३५ लाख रुपैयाँ बजेट छुट्याएको थियो । यो वर्ष पनि ५ लाख रुपैयाँ विनियोजन गरिएको कुमालले बताए ।
आयोजनामा अहिले पाइप बिछ्याउने, ट्याङ्की र धारा निर्माणको काम भइरहेको छ । एक घर, एक धाराको सरकारी लक्ष्यअनुसार निर्माण भइरहेको वडाध्यक्ष डम्बर श्रीसले बताए ।
वडा नं ११ मै सञ्चालित झारसादी–मजुवा–अरले–मनेवापाटा खानेपानी आयोजनाले पनि स्थानीय ७० घरधुरी लाभान्वित हुने श्रीसले बताए ।
हिउँदमा खानेपानीको सङ्कट झेल्दै आएका ठूलो रिघा लगायतका गाउँमा ‘लिफ्टिङ’ प्रविधिबाट खानेपानी पु¥याउने योजना छ । वडा नं २ नरेठाँटीमा पनि ‘एक घर, एक धारा’ पु¥याउने लक्ष्यसहित ‘जसपुर–घामपानी–मसरा खानेपानी तथा सरसफाइ आयोजना’ निर्माणाधीन छ । संघीय सरकारको २३ करोड रुपैयाँमा बन्ने आयोजना आगामी सात वर्षमा पूरा हुनेछ ।
दुई वर्षअघि शुरु भएको आयोजनामा रु एक करोड बराबरको काम भइसकेको उपभोक्ता समितिले जनाएको छ । उक्त आयोजना बनेपछि नरठाँटीका ६५० घरधुरीमा खानेपानीको सहज पहुँच पुग्नेछ । रासस
प्रतिक्रिया