तनहुँको दमौलीस्थित सरकारी अस्पतालमा सुत्केरी गराएका महिला यातायात खर्च पाउनबाट वञ्चित भएका छन् ।
गत आर्थिक वर्ष ०७५/७६ मा दमौली अस्पतालमा सुत्केरी गराएका २३ महिलाले अहिलेसम्म पनि यातायात खर्च पाएका छैनन् ।
सरकारी स्वास्थ्य संस्थामा सुरक्षित सुत्केरी गराउने महिलालाई यातायात खर्चबापत सरकारले २ हजार रुपैयाँ र नियमित ४ पटक गर्भ परीक्षण गर्नेलाई थप ८ सय रुपैयाँ दिँदै आएको छ ।
तर अस्पतालको लापरवाहीले गत आर्थिक वर्षको अन्तिम साता सुत्केरी भएका महिलाले यातायात खर्चबापतको रकम पाउन सकेका छैनन् ।
अस्पतालको सरकारी खाता गत असार २५ गते नै बन्द गरिएको र त्यसपछि कुनै पनि रकम झिक्न नपाएको कारण सो मितिभन्दा पछि सुत्केरी हुन आउनेलाई रकम दिन नसकिएको अस्पताल व्यवस्थापन समितिका अध्यक्ष प्रदीपराज अधिकारीले बताए ।
सुत्केरीले रकम नपाएका बारेमा आफूले नयाँ आर्थिक वर्ष लागेपछि मात्र जानकारी पाएको हुँदा त्यसबारेमा सम्बन्धित कर्मचारीलाई स्पष्टीकरण सोधिएको उहाँले बताउनुभयो ।
गत असार २५ गतेपछि असार ३२ गतेसम्म अस्पतालमा २३ जनाको सुत्केरी गराइएको थियो । ती सबै सुत्केरीले प्राविधिक कठिनाइको कारण अब सरकारी सुविधा नपाउने दमौली अस्पतालकी नर्सिङ अधिकृत जमुनादेवी शर्माले जानकारी दिइन् ।
अस्पतालका लेखापालको लापरवाहीका कारण सुत्केरीले आफ्नो सुविधाबाट वञ्चित हुनुपरेको गुनासो छ । अस्पताल व्यवस्थापन समितिका सदस्य नरेन्द्र ढकालले आर्थिक व्यवस्थापनको कुरा लेखापालले मिलाउनुपर्नेमा नभएकाले समस्या उत्पन्न भएको बताए ।
सो अस्पतालमा गत आवमा ६०७ को सुरक्षित सुत्केरी गराइएको थियो । चालू आवको साउनमा अस्पतालमा सुत्केरी गराएका ७२ महिलाले पनि यातायात खर्च पाएका छैनन् ।
चालू आवमा अहिलेसम्म खाता सञ्चालनको अख्तियारी प्राप्त नभएका कारण सुत्केरी भएकालाई रकम उपलब्ध गराउन नसकिएको अस्पताल प्रशासनले जनाएको छ ।
अस्पतालका तत्कालिन लेखापाल पार्वती पौडेल स्वयं सुत्केरी भई बिदामा बसेकाले नयाँ लेखापालको व्यवस्था नभएको र अहिले आर्थिक कारोवार ठप्प रहेको अस्पतालका प्रशासन अधिकृत गुरुदत्त घिमिरेले जानकारी दिए । रासस
प्रतिक्रिया