निर्माण सुरू भएको ८ वर्षपछि पुल सञ्चालन

कात्तिक १२, बाजुरा । बाजुराको प्रमुख सडक साफे–मार्तडी सडकखण्डको गुइगाड खोलामा निर्माण गरिएको पक्की पुल ८ वर्षपछि सञ्चालनमा आएको छ । ६० मिटर लामो उक्त पुल सम्झौता अवधि सकिएको वर्षपछि मात्र निर्माण कार्य सकिएको हो ।

प्रमुख जिल्ला अधिकारी चेतराज बराल, प्रहरी नायब उपरीक्षक उद्धवसिंह भाट र नेपाल पत्रकार महासङ्घका अध्यक्ष प्रकाश सिंहको टोलीले पुल उद्घाटन गरी सञ्चालनमा ल्याएको छ ।

यातायात सेवा सञ्चालन भएको १० वर्षपछि बाजुराको मुख्य सडकमा रहेको पुल सञ्चालनले बाजुरावासीमा ठूलो आशा जगाएको छ ।

करीब आठ वर्षअगाडि निर्माण हुन लागेको सो पुल निर्माण कार्य सम्पन्न भएको तीन महीनापछि सञ्चालनमा ल्याइएको प्रजिअ बरालले बताए ।

पुल निमार्णका लागि २०६८ सालमा ठेक्का सम्झौता भई २०७० साल असार मसान्तसम्म सक्नुपर्ने सम्झैता भए पनि २०७२ साल असारसम्म म्याद थपिएको थियो ।

विसं २०७० साउन मसान्तभित्र काम पूरा नभएपछि सडक विभागले पुनः काम गर्ने गरी सोही रकममा कम्पनीलाई म्याद थप गरेको थियो । तर २०७१ सालमा समेत पुल निर्माण गर्न नसक्दा पुुनः तेस्रो पटक म्याद थपेर काम गरेको थियो । रासस