Logo

तालपोखरा चिप्लेढुंगा सडकखण्ड अन्तर्गत बहखोला पक्की पुल शिलान्यास



 

११ असार, रामपुर– पाल्पा । पाल्पाको रामपुर नगरपालिका ५ र ६ जोड्ने बहखोलामा पक्की पुल बन्ने भएको छ । तालपोखरा चिप्लेढुंगा सडकखण्ड अन्तर्गत पर्ने बहखोलामा निर्माण हुन लागेको पक्की पुलको रामपुर नगरपालिकाका प्रमुख रमणबहादुर थापाले आइतबार शिलान्यास गरे ।

नगर प्रमुख थापाले गाउँको विकासका लागि सडक, बिजुलीको अति आवश्यक रहेको बताउँदै तालपोखरा, विजयपुर, किसानबारी, बेझाड बजार क्षेत्रलाई अब रिङरोडको अवधारणा अनुसार काम गरिने बताए ।

पर्यटकीय क्षेत्र तालपोखरासंग जोडिएको हुँदा पनि यहाँ पुल निर्माण सम्पन्न भएपछि तालपोखरा घुम्न आउने पर्यटकको आवजावतमा ठूलो राहत मिल्ने उनको भनाइ थियो । यस पुल निर्माणका लागि नगर प्रमुख थापाले नगरपालिकाबाट ५ लाख सहयोग गर्ने घोषणा गरे ।

एक करोड १९ लाखको लागतमा १० मिटर लम्बाइ र आठ मिटर चौडाइ रहेको पक्की पुल निर्माण गर्ने समितिका सचिव भरतराज देवकोटाले बताए ।

सिद्धबाबा सडकको वैकल्पिक ट्रयाक खुल्यो

सिद्धार्थ राजमार्गको पाल्पा बुटवल सिद्धबाबा सडकखण्डको वैकल्पिक मार्ग झुम्सा चौकीभञ्याङ देवदह चरङ्गेको नयाँ ट्रयाक खुलेको छ । आगामी आवभित्र यस सडकलाई डबल लेनको रुपमा स्तरोन्नति गरिने भएको छ ।

वैकल्पिक सडक निर्माणको लागि तिनाउ गाउँपालिकाले ६० लाख र रिब्दीकोट गाउँपालिकाले १० लाख लगानी गरिसकेका छन् । तानसेन नगरपालिकाले २० लाख र बगनासकाली गाउँपालिकाले ५ लाख र देवदह नगरपालिका रुपन्देहीले १० लाख गरी एक करोड १० लाखमा बाटोको ट्रयाक खोलिएको तिनाउ गाउँपालिका अध्यक्ष ओमबहादुर घर्तीमगरले बताए ।
रासस

प्रतिक्रिया दिनुहोस्