सामुदायिक वनमा चियाखेती

म्याग्दीको बेनी नगरपालिका–२ गौश्वाराको सिद्धभूमे हरियाली सामुदायिक वनमा गरिएको चियाखेती सफल भएको छ ।

यस वर्षदेखि समुदायले उत्पादन लिने तयारी गरेका छन् । सामुदायिक वनको १० रोपनी क्षेत्रफल जमीनमध्ये ४ रोपनी क्षेत्रफलमा परीक्षणको रुपमा गरिएको चियाखेती सफल भएको सिद्धभूमे हरियाली सामुदायिक वन उपभोक्ता समितिका सदस्य रामबहादुर गुरुङले बताए ।

समुद्रीक सतहदेखि २ हजार २०० मिटरको उचाइमा रहेको गौश्वारामा ७ वर्षअघि गोल्डेन जातको चियाका ५ हजार बिरुवा परीक्षणको रुपमा लगाइएको थियो । तिनै बिरुवा हुर्केर अहिले सो क्षेत्र चियाको वगान बनेको छ ।

“हामीले परीक्षणको रुपमा लगाएका बिरुवाले यस वर्षदेखि उत्पादन दिन सफल भएका छन्,” गुरुङले भने, “चिया खेती निकै राम्रो भएको छ । आगामी दिनमा चियाका बिरुवाहरु थप्ने योजनामा छौँ ।”

गौश्वारा गाउँ शितोष्ण हावापानी भएको र पूर्वतर्फ फर्किएको जौविक विविधताले सम्पन्न नमूना गाउँ हो ।

गौश्वाराको वन क्षेत्रमा साल, सिर्मु, सल्ला लगायतका काठ तथा विभिन्न किसिमका जडिबुटी तथा जङ्गली जनावर र पंक्षी देख्न सकिन्छ ।

“चिया खेतीलाई प्रवद्र्धन गरी व्यावसायिक खेती शुरु गर्ने हो भने राम्रो आम्दानी गर्न सकिन्छ,’’ स्थानीय परमेश्वर मल्लले भने । रासस