जाजरकोट । कुशे गाउँपालिकाको सबै वडा सडक सञ्जालसँग जोडिएका छन् । गाउँपालिकाले सडक निर्माण र विस्तारलाई पहिलो प्राथमिकतामा राखेर काम गरेको हो ।
सडक सञ्जाल जोडिएपछि यातायात सञ्चालनमा आउनुको साथै दैनिक उपभोग्य वस्तु ढुवानी गर्न र स्थानीयलाई आउजाउ गर्न सहज भएको हो । गाउँपालिकाले अघिल्लो आर्थिक वर्षमा नौ वडामा १२ वटा सडकको ट्रयाक खोलिएको थियो । गत वर्षसम्म कुशेको वडा नं ५ को केन्द्र मात्र सडक सञ्जालसँग जोडिएको थियो ।
जाजरकोट–ब्युलीढुङ्गा–जुम्ला सडकमा पर्ने पाँचकटिया, दम्दाला, ढिमे, खुर्पालगायत गाउँमा मात्र सडक पहुँच रहेकामा यस वर्ष सबैलाई सडक सञ्जालले जोडेको गाउँपालिका अध्यक्ष हरिचन्द्र बस्नेतले बताए । पहिलो वर्ष सडकको नयाँ ट्रयाक खुला गरेर सडक चौडा बनाउने, नालीलगायत काम गरेर १२ महीना सडक सञ्चालनमा आउने बस्नेतले बताए ।
जुम्ला–जाजरकोट सडकलाई मुख्य आधार मानेर ग्रामीण सडक निर्माण भएका छन् । कुशे गाउँपालिकामा पर्यटन प्रवर्द्धन तथा कृषिउपज, खनिज, जटीबुटीलगायतलाई बजारीकरण गर्न सडक निर्माणलाई महत्व दिएको हो ।
सडक निर्माण भएपछि बजारबाट दैनिक उपभोग्य सामग्री ढुवानी गर्न निकै सजिलो भएको स्थानीयले बताएका छन् । पहिले मान्छे हिँड्नलाई साँघुरो बाटो थियो, सामान ओसारपसार गर्न अफ्ठेरो हुन्थ्यो, अहिले गाउँपालिकाले सडक निर्माण गरेपछि धेरै सहज भएको स्थानीय दलबहादुर थापाले बताए ।
विकट गाउँमा सडक पुगेपछि यहाँका स्थानीयवासीको वर्षौंको थाप्लोमा भारी बोकेर पैदल हिँड्नुपर्ने पीडा हटेको छ । “पहिले नून लिनलाई एक महीना हिँडेर नेपालगञ्ज जानुपर्थ्यो, अहिले घरैमा नून आयो”, कुशे–४ ताँगाचौरको रङ्गबहादुर कामीले भने । कुशे सुन्तला तथा आलु उत्पादन, काइनाइट, टुर्मालिन पत्थरलगायत खनिज र सयौँ प्ररकारका जडीबुटीले गाउँपालिका धनी छ ।
सडक निर्माणसँगै दुर्गम क्षेत्रको कृषि उत्पादनले बजार पाउनुको साथै स्थानीय बासिन्दालाई दैनिक उपभोग्य वस्तु ओसारपसारमा सहज भएको छ । दुर्गम र विकट गाउँपालिकाको रुपमा रहेको कुशेका विकट र ग्रामीण बस्तीमा सडक पहुँच पुगेपछि सर्वसाधारण कृषि उत्पादन र व्यवसायतर्फ उन्मुख देखिएका छन् ।
कुशे गाउँपालिकाले सडक विस्तारमा १० करोड बढी रकम खर्च गरेको जनाएको छ । स्थानीय खोलामा सडक पुल निर्माणको लागि सङ्घीय तथा प्रदेश सरकारसँग बजेट माग गरेको गाउँपालिकाले जनाएको छ । रासस
प्रतिक्रिया