सहरमा भन्दा ग्रामीण क्षेत्रमा महको माग बढ्दो

असार ४, सिराह । सिराहका गाउँपालिकाहरूमा उत्पादन हुने मह सिरहाका प्रमुख बजारहरूमा भन्दा ग्रामीण क्षेत्रमा बढी माग हुने गरेको छ ।

स्थानीयस्तरमा उत्पादन हुने वस्तुको बढी खपत सहर र सहरोन्मुख क्षेत्रमा हुने गर्छ । तर यसको बिपरीत मौरीको मह सहरमा भन्दा गाउँमा खपत हुँदै आएको छ

भवानीपुरका गायत्री मौरी विकास केन्द्रका सञ्चालक चन्देश्वर कामतीले अहिले मासिक २५ बाकस मौरी पालिरहेका छन् । कामतीको अनुभवमा आफूले उत्पादन गरेको सबै मह गाउँमै खपत हुँदै आएको छ ।

“बजारबासीहरू हर्लिक्स, बुस्ट र कम्पनीले प्याकेज गरेको मह खान्छन्,” कामतीले भने “तर गाउँका बासिन्दाहरूले घरेलु भिटामिन र औषधिको रुपमा मह नै प्रयोग गर्छन् । त्यसैले गाउँमा महको माग धेरै भएको हो ।”

उत्पादन भएको मह घरमै बिक्री भएका कारण ग्रामीण भेगका कृषक मौरीपालनतर्फ आकर्षित भएको लहानको मनकामना मौरी विकास केन्द्रले जनाएको छ ।

ग्रामीण क्षेत्रमा उत्पादन हुने महमा मिसावट नहुने उपभोक्ताको विश्वास छ । एक घारमा औसत २५ केजीसम्म मह उत्पादन हुने गर्छ । नेपाली बजारमा अहिले महको मूल्य प्रतिकेजी महको ३ सय रुपैयाँ पर्छ ।

गाउँमै बसेर थोरै लगानीमा धेरै आम्दानी गरिरहेको हुँदा मौरीपालकको जीवनस्तरमा पनि सुधार भएको जिल्ला कृषि विकास कार्यालय सिरहाले जनाएको छ । कार्यालयको तथ्यांकनुसार सिरहाका २४ स्थानीय तहका करीब ३५ किसानले मौरीपालन गरिरहेका छन् । रासस