कम्पोष्टमल र वायोग्यास प्लान्टको काम शुरु

असार २, खोटाङ । दिक्तेल रुपाकोट मझुवागढी नगरपालिकामा कम्पोष्ट मल र वायोग्यास प्लान्टको काम शुरु भएको छ । सरकारले दिने विशेष अनुदानवापतको तीन करोड ३२ लाखको लागतमा दिक्तेल रुपाकोट मझुवागढी नगरपालिकामा–२ सोल्मामा कम्पोष्ट मल र वायोग्यास प्लान्टको काम शुरु गरिएको हो ।

विशेषगरी दिक्तेलबजार, सोल्मा लगायतका ठाउँबाट निस्कने सड्ने र गल्ने वस्तुलाई प्रशोधन गरेर कम्पोष्टमल उत्पादन गर्ने तथा मानव मलमूत्रलाई प्रयोग गरेर वायोग्यास उत्पादन गर्दै अर्ग्यानिक नगर बनाउने अभियानलाई सफल बनाउन कम्पोष्टमल र वायोग्यास प्लान्टको काम शुरु गरिएको नगरप्रमुख दीपनारायण रिजालले बताए ।

“उत्पादित ग्यासलाई सिलिण्डरमा भरेर भान्छामा उपयोग गर्ने र बाँकी रहेको फोहरमैलालाई मलकै रुपमा प्रयोग गर्ने योजना बनाएका छौँ”, उनले भने, “यसले नगरपालिकालाई स्वच्छ र सफा राख्न मद्दत गर्नुका साथै अर्ग्यानिक नगर बनाउन टेवा पुग्नेछ ।”

कम्पोष्ट मल र वायोग्यास प्लान्ट निर्माण गर्न आवश्यक ट्रष्ट भवनको आइतबार नगरप्रमुख रिजाल र उपप्रमुख विणादेवी राईले औपचारिकरूपमा शिलान्यास गरेका छन् । नगर कार्यपालिका सदस्य गङ्गाबहादुर विश्वकर्माले निःशुल्क उपलब्ध गराएको जग्गामा ट्रष्ट भवन शिलान्यास गरिएको हो ।

नगरपालिकालाई व्यवस्थित ढङ्गले अर्ग्यानिक कृषिक्षेत्र बनाउने अभियानअन्तर्गत रासायनिक मलको अनुदानको विकल्पमा कम्पोष्ट प्लान्टको विकल्प सँगसँगै अघि बढाएको नगरप्रमुख रिजालले बताए ।

विशेष प्राथमिकताका साथ अघि सारिएको अर्ग्यानिक नगर बनाउने अभियानअन्तर्गत यसअघि सम्बन्धित सरोकारवालाको बृहत सहभागितामा रासायनिक मल तथा विषादी प्रयोगले मानवस्वास्थ्यमा पार्ने असरलगायतका विषयमा छलफल तथा अन्तरक्रिया गरिएको थियो । नेपाल कर्माकल्चर समूह ९एनपीजी० बबरमहल काठमाडौंसँगको सहकार्यमा नगरलाई प्राङ्गारिक कृषिक्षेत्र बनाउने अभियान शुरु गरिएको हो । रासस