माघ २६, बाजुरा । गाउँ–गाउँमा बैंक स्थापनासँगै आर्थिक कारोवार गर्न स्थानीयवासीलाई सहज भएको छ । स्थानीय तहमा बैंकले शाखा विस्तार गरी सेवा दिन थालेपछि दैनिक कारोवार गर्न सहज भएको हो ।
जिल्लाका नौ वटै स्थानीय तहमा बैंकका शाखा स्थापना भएका छन् । शहरमा केन्द्रित रहेका निजी बैंकहरु राष्ट्र बैंकको ताकेतासँगै गाउँगाउँमा पुगेका छन् ।
स्थानीय तहसँगको दैनिक आर्थिक कारोबाार गर्ने सहमतिसहित बैंकहरु स्थापना गरिएको हिमालयन बैंक शाखा डोगडीमा कार्यरत कर्मचारी लोकेन्द्र रावतले बताए ।
हिमालयन बैंकले खप्तड छेडेदह गाउँपालिकाबाट सेवा शुरु गरेको छ । गाउँमा बैंक स्थापनासँगै मार्तडी आएर कारोवार गर्नुपर्ने समस्या हटेको गाउँपालिका अध्यक्ष नरबहादुर रावतले बताए ।
बंैक स्थापनापछि गाउँपालिकासहित उपभोक्ता समितिका खाता खोल्नदेखि चेक साट्नुपर्ने सबै प्रकारका झन्झट हटेको अध्यक्ष रावतको भनाइ छ । बैंकले गत पुस १ गतेबाट सेवा सञ्चालन गरी डेढ महीनाको अवधिमा १० लाख बचत रकम उठाएको छ भने १ सय ५० भन्दा बढी ग्राहक खाता खोलिसकेको छ ।
डोगडीमा शाखा स्थापनासँगै हिमालयन बैंकमा बझाङको खप्तड छान्ना गाउँपालिकाबाट पनि कारोवार गर्न शुरु गरिएको रावतले जानकारी दिए । साबिकका काँडा, जयबागेश्वरी, आटीचौर, डोगडी र गुदुखातीसहित छिमेकी स्थानीय तहलाई समेत कारोवार गर्न सहज भएको छ ।
सदरमुकाम मार्तडी आउँदा एक जनाको कम्तीमा १ हजार ५ सय रुपैयाँ खर्च गर्नुपर्ने बाध्यता डोगडीमा बैंक स्थापनासँगै हटेको स्थानीयवासी अम्म नाथले बताए ।
गाउँमा बैंक पुगेपछि तरकारी बिक्री गरेर पनि किसानले नगद जम्मा गर्न सक्ने अवसर जुरेको जनप्रतिनिधिले बताए । स्थानीय तहसँगै किसानले पनि खातामा रकम जम्मा गर्न थालेका छन् । रासस
प्रतिक्रिया