स्थानीय खबर संवाददाता
स्थानीय तहको निर्वाचनलाई प्रभावित पार्न सरकारले आफ्ना कार्यकर्ताहरूलाई झूठा मुद्दामा फसाउन थालेको प्रमुख प्रतिपक्षी दल नेकपा एमालेले दाबी गरेको छ ।
एमालेका महासचिव इश्वर पोखरेलले काभ्रेलगायतका विभिन्न जिल्लामा झूठा मुद्दा लाएर एमाले कार्यकर्तालाई आतंकित पार्न खोजिएको बताए । 
“काभ्रेमा एमाले उम्मद्वारका भाईलाई शंकाको भरमा पक्राउ गर्नेवित्तिकै सार्वजनिक मुद्दा लागाइएको छ,” उनले भने, “एमाले कार्यकर्तामाथी शंकाको भरमा पक्रेर मुद्दा दायर गरिहाल्ने घटना बढ्दै गएको छ । यसबारे सुरक्षा निकायका प्रमुखहरूलाई ध्यानाकर्षण गराईसकेका छौं ।”
निर्वाचनसम्म एमाले कार्यकर्तालाई थुनेर मतपरिणाम नै प्रभावित पार्ने खेलमा सरकार लागेको पोखरेलको जिकीर थियो । म्यादी प्रहरीमा पनि निर्वाचन भाँड्ने तत्वहरू घुसेको सुचना एमालेले पाएको र यसप्रति गम्भीर रहन सुरक्षा निकायका प्रमुखहरूलाई आग्रह गरेको उनले बताए ।
दोस्रो चरणको निर्वाचन जेठ ३१ गते अस्वीकार्य
जेठ ३१ गते गर्ने भनिएको दोस्रो चरणको स्थानीय चुनाव एमालेलाई अस्वीकार्य भएको महासचिव पोखरेलले स्पष्ट पारे । अघिल्लो र पछिल्लो चरणको चुनावको ‘ग्याप’ धेरै रहेको हुँदा समस्या धेरै आउने उनले बताए ।
“पहिलो चरणको मतपत्र एक महिनासम्म राख्ने कुरा व्यवहारिक हुँदैन । भोट गनिहाल्यो भने पनि अघिल्लो निर्वाचन परिणामले पछिल्लो निर्वाचन परिणामलाई असर गर्छ,” उनले भने, “जेठ अन्तिमतिर मुस्लिम समुदायको रमजान पर्व पर्छ । दिनभर भोकै बस्नु पर्ने हुँदा जेठ ३१ व्यवहारिक हुँदैन । त्यसैले जेठ १५ अगावै दोस्रो निर्वाचन हुनुपर्छ ।”
मुस्लिम समुदायको रमजान पर्वमा दिनभर खान खानै नहुने भएकाले निर्वाचन अघि सार्न आग्रह गर्दा कांग्रेसले गैरजिम्मेवार पूर्ण जवाफ फर्काएको उनले बताए । कांग्रेस सभापति शेरबहादुर देउवाले एमाले नेताहरूसँग कांग्रेसलाई मुस्लिमबिरोधी भएको देखाएर चुनावमा जान पनि चुनौति दिएको उनले बताए ।
प्रतिक्रिया