गोदावरीको छोटेडाँडामा विद्यार्थीलाई पोसाक वितरण

कृष्णमुरारी पुडासैनी 
आश्विन १९, ललितपुर

गोदावरी नगरपालिकाको छोटेडाँडा आधारभुत विद्यालयका विद्यार्थीहरूलाई पोसाक र स्टेसनरीका सामान वितरण गरिएको छ । भौगोलिक रुपमा अति विकट मानिने वडा नं. ७ मा रहेको यस विद्यालयका छात्रछात्रालाई नगरपालिकाकी उपप्रमुख मुना अधिकारीको पहलमा सहयोग बितरण गरिएको हो ।

नजिकिँदो दशैंलाई मध्यनजजर गर्दै पोसाक र स्टेसनीरीका सामाग्री बितरण गरिएको अधिकारीले बताईन् । करिव ५ महिनादेखि विद्यालय भ्रमणमा जाँदा बालवालिकाको दयनीय अवस्था देखिए पछि अधिकारीले विभिन्न संघसँस्था र व्यक्तिसँग सहयोगका लागी पहल गरेकी हुन् ।

विपन्न विद्यार्थीहरूलाई नगरपालिकाले प्राथमिकतामा राखेर काम गरे पनि स्रोत साधन सिमित रहेको उनले बताईन् । स्रोत साधन पर्याप्त नभएकाले विभिन्न संघसँस्था र व्यक्तिसँग सहयोगका लागी पहल गरेको पनि अधिकारीले बताईन् ।

बितरण कार्यक्रममा ४५ जना विद्यार्थी उपस्थित थिए । उक्त विद्यालय ५ कक्षासम्म सञ्चालनमा छ । गोदवारी राजधानी उपत्यकाको नगरपालिका भए पनि वडा नं. ७ का विद्यार्थीहरू माध्यमिक तह पढ्न करिव ३ घण्टासम्म हिड्नु पर्ने समस्या छ ।

कार्यक्रममा गोदावरीको मैत्रेय फाउण्डेशनकी अध्यक्ष महिमा पोखरेलले उच्च शिक्षा पढ्न इच्छुक विद्यार्थीलाई आफ्नै होस्टेलमा राख्ने प्रतिवद्धता जनाईन् ।

कार्यक्रममा छात्राहरुलाई छात्रवृत्ति र विद्यालमा सबैभन्दा धेरै नियमित कक्षामा आउने बिद्यार्थीहरूलाई पुरस्कृत गरिएको थियो । नियमित कक्षामा आउने विद्यार्थीलाइृ पुरस्कृत गर्दा विद्यार्थीको हौसला बढ्ने वडा अध्यक्ष गिरीप्रसाद तिमल्सिनाले बताए । तिमल्सिनाले शिक्षाकहरूलाई इमान्दार भएर पढाउन आग्रह गर्दै लापरवाही गरे कारवाही गर्ने चेतावनी दिए ।

नगरपालिकामा बालमैत्री अभियान सञ्चालन अन्तर्गत विभिन्न कार्यक्रम रहेको जानकारी दिँदै किशोरीहरूलाई छिट्टै “सेल्फ डिफेन्स” को तालिम सञ्चालन हुने पनि उपप्रमुख अधिकारीले बताईन् ।

गोदावरी नगरपालिकाले बालमैत्री स्थानीय तह घोषणा गर्न बालबालिकालक्षित विभिन्न कार्यक्रम सञ्चालन गर्दै आएको छ । “गोदावरीलाई निकट भविष्यमै बालमैत्री नगरपालिका घोषणा गर्दैछौं । बालमैत्री घोषणा गर्न पूर्वतयारी स्वरुप विद्यार्थी लक्षित विभिन्न कार्यक्रमहरू सञ्चालन गरिरहेका छौं,” अधिकारीले भनिन् । समाजसेवी शारदा श्रेष्ठले नगरपालिकाको पहलबाट आफू प्रभावित भएको बताईन् ।