स्थानीय खबर संवाददाता
काठमाडौं, १२ भदौ
गाउँपालिका र नगरपालिकाहरूले जथाभावी कर लगाएको बिषयमाथी प्रधानमन्त्री केपी शर्मा ओलीले उत्पादनमा नभई बिक्रीमा कर लगाएको बताएका छन् ।
“उत्पादन गर्दा होइन, बिक्रि गर्दा कर लगाईएको हो । अण्डा उत्पादन गर्दा कर लगाइएको होइन, बिक्री गर्दा लगाइएको हो,” उनले भने, “अण्डा पार्यो कि पारेन भन्दै मेयर र अध्यक्षले कुखुराको खोर हेर्दैन । बिक्री गर्दा चाँही स्थानीय कानूनअनुसार कर लगाउँछ ।”
नेपाल नगरपालिका संघको छैटौं राष्ट्रिय अधिवेशनको उद्घाटन गर्दै करको बिषयलाई लिएर नचाहिँदो हल्ला फिँजाईएको दाबी गरे । साथै पछिल्ला बर्षहरूमा नगरपालिकाको संख्या उल्लेख्य बढेको र नगरपालिका बने पछि बढी कर तिर्नु परेकाले पनि यस्ता गुनासोहरू आएको उनले बताए ।
“कञ्चनपुरमा स्थानीयबासीले छाडा पशु चौपायलाई व्यवस्थापन गरिदेउ भनेर नगरपालिकामा लगेछ । यता गाईभैंसीलाई पनि कर लगायो, त्यही भएर जनताले गाईभैंसी नगरपालिकामा बुझायो भनेर हल्ला भयो,” उनले भने, “सबै ठाउँमा राम्रै भइरहेको छ भनेर भन्दिँन । केही स्थानीय तहमा कमीकमजोरी पक्कै भएका छन् । तर अहिले जुन हौवा फिँजाईएको छ, यो सत्य होइन ।”
स्थानीय तहले कर उठाउँदा आफूले गाली खानु परेको गुनासो पनि उनले गरे । स्थानीय तह आफैंले कानून बनाएर कर संकलन गर्न पाउने संबैधानिक व्यवस्था भएको र त्यसमा संघीय सरकारले हस्तक्षेप गर्न नमिल्ने उनले बताए ।
स्थानीय तह अधिकारसम्पन्न भएको धेरैलाई पचेको छैन
प्रधानमन्त्री ओलीले गाउँपालिका र नगरापलिका अधिकारसम्पन्न भएको धेरैलाई नपचेको पनि आरोप लगाएका छन् । उपप्रमुखलाई देखाएर ‘ए, यो पनि न्यायधिश !’ भनेर खिसी गर्नेहरू प्रशस्तै भएको उनले बताए ।
“सरकार भनेको ठालू प्रवृत्ति हो भन्ने भ्रम छ । त्यसैले गाउँगाउँमा सरकार आयो भन्दा त्यही ठालू प्रवृत्ति बोकेका मान्छेहरूले यो पनि सरकार भनेर खिसी गरिरहेको छ,” उनले भने, “नयाँ व्यवस्थामा जाँदा केही बाधा अफ्ठेरो अवश्य आउँछ । त्यसका लागी ७ सय ५३ स्थानीय सरकार, ७ वटा प्रदेश सरकार र संघीय सरकार मिलेर अगाडी बढौं । सुखी नेपाली, समृद्ध नेपालको सपना साकार हुनेछ ।”
प्रतिक्रिया