राकेशकुमार मिश्र
१० असार, खजुरा– बाँके ।
स्थानीय डुडुवा गाउँपालिकालाई पूर्ण खोप सुनिश्चित गाउँपालिका घोषणा गरिएको छ । जिल्ला समन्वय समिति संयोजक अजय श्रीवास्तवले सो घोषणा गर्दै बालबालिकाका लागि खोप अमृत रस भएकाले यसलाई कहिलै पनि छुटाउन नहुनेमा जोड दिए ।
उनले खोप कार्यक्रमलाई सफल बनाउन महिला स्वास्थ्य स्वयंसेविकाको प्रमुख दायित्व भएकाले उनीहरुको सोवाको स्थानीय सरकारले कदर गर्नुपर्नेमा जोड दिए । गाउँपालिका अध्यक्ष नरेन्द्रकुमार चौधरीले गाउँपालिकाको पहिलो प्राथमिकतामा स्वास्थ्य परेकाले घर घरमा स्वास्थ्य अभियान गरी यसमा सुधार ल्याइने बताए ।
उक्त गाउँपालिकाका स्वास्थ्य शाखा संयोजक धनबहादुर बुढाले पूर्ण खोप घोषणाको अवस्था तथा समग्र गाउँपालिकामा स्वास्थ्य अवस्थाका विषयमा प्रतिवेदन प्रस्तुत गरेका थिए । कार्यक्रममा गाउँपालिकाअन्तर्गत साठी वर्ष पुगेका महिला स्वयंसेवीहरू सुन्दरा लोनिया, जन्नतुल सल्मानी र जाहिरा बेगमलाई जनही २० हजार प्रदान गर्नुकासाथै बिदाइ गरिएको थियो ।
गाउँपालिकामा खोप सेवा लिने जन्मेदेखि एक वर्षका बालबालिकाको संख्या एक हजार १०९ पुगेको छ । जिल्लाका आठ वटा स्थानीय तहमध्ये डुडुवासंगै खजुरा र वैजनाथ गाउँपालिका पूर्ण खोप गाउँपालिका घोषणा भइसकेका छन् ।
ओपिडी सेवा शुरु
बाँके जिल्लाको खजुरास्थित शुशील कोइराला क्यान्सर अस्पतालले सोमबारदेखि ओपिडी सेवा शुरु गर्ने भएको छ । सेवा सञ्चालनका लागि स्वास्थ्यकर्मी र कर्मचारीको व्यवस्थाका साथै सबैखाले उपकरण जडान भइसकेको अस्पतालका अध्यक्ष किश्मतकुमार कक्षपतिले बताए ।
उनका अनुसार १०० शैयाको मान्यता पाएको सो अस्पतालले शुरुमा ५९ शैयाबाट आफ्नो सेवा प्रारम्भ गर्नेछ । सो अस्पतालका लागि चालू आर्थिक वर्षमा १८ करोड बजेट विनियोजन गरिएको छ ।
प्रदेश नं ५, कर्णाली र ७ का नागरिक सो अस्पतालमा बाट लाभान्वित बताइएको छ । विसं २०६५मा शुरु गरिएको अस्पतालमा हालसम्म ३५ करोडभन्दा बढी लगानी भइसकेको छ ।
रासस
प्रतिक्रिया