Logo

नौ दिनदेखि फुङलिङ नगरवासी अन्धकारमा



 

२९ जेठ, ताप्लेजुङ । विद्युत्सेवा बन्द भएपछि ताप्लेजुङको फुङलिङ नगरपालिकाका २ वटा वडा विगत नौ दिनदेखि अन्धकारमय बनेका छन् ।

फुङलिङ नगरपालिका–१० फुरुम्बुमा रहेको याफ्रे लघु जलविद्युत् आयोजनाको टर्वाइनमा आएको खराबीका कारण विद्युत् सेवा बन्द भएपछि वडा नम्बर १० र ११ साविकको हाङ्देवा र फुरुम्बु गाविस अन्धकारमय बनेका हुन् ।

गएको जेठ २० गतेदेखि टर्वाइनमा आएको खराबीका कारण विद्युत्सेवा बन्द भएको आयोजनाले जनाएको छ । यता लामो समयसम्म विद्युत् सेवा बन्द हुँदा स्थानीय उपभोक्ता भने अन्धकारमा बस्न बाध्य छन् ।

विद्युत् नहुँदा मट्टितेलको भरमा रहनु परेको स्थानीय विष्णुप्रसाद पोखरेलले बताए । महिनामा बल्लतल्ल बीस दिन बत्ती बल्ने गरेकोमा अहिले पूरै बन्द हुँदा समस्या भएको पोखरेलको भनाइ छ ।

आयोजनाको व्यवस्थापनमा हेलचेक्राइँ हुने गरेकाले लामो समयसम्म विद्युत् अवरोध हुँदै आएको स्थानीयको आरोप छ । हाल बिग्रिएको टर्वाइन मर्मतका लागि अझै केही दिन लाग्ने आयोजनाले जनाएको छ ।

यस्तै उक्त आयोजनाले ल्याब टेष्ट नगरेका साथै कमसल प्रकारका मिटरबक्स जडान गरेकाले उपभोक्ता समस्यामा परेको जनाइएको छ । सामान्य बत्ती बाल्दा पनि धेरै महशुल देखिने, मिटर बक्सबाट ठूलो आवाज आउने जस्ता समस्या देखिएको स्थानीय घनेन्द्र गुरुङले बताए ।

उनका अनुसार आयोजना निर्माणका समयमा भएको इस्टमेट अनुसारका सामान नल्याइएको र कमसल प्रकारका सामान जडान गरिएकाले समेत समस्या भएको छ ।

विभिन्न ठाउँमा अर्थिङ जडानका लागि उपभोक्तासंग आयोजनाले पैसा उठाएको तर हालसम्म अर्थिङ जडान नहुँदा आफूहरु त्रासमा परेको स्थानीयले बताएका छन् । ९५ किलोवाट क्षमताको उक्त आयोजनाबाट ९४५ घरपरिवारले विद्युत् उपभोग गर्दै आएको बताइएको छ ।
रासस

प्रतिक्रिया दिनुहोस्