१८ पुस, बाजुरा ।
सडक सञ्जाल जोडिएपछि जिल्लाका अधिकांश झोलुङ्गे पुल जीर्ण बन्दै गएका छन् । सडक सञ्चालन भएपछि बाढी आएका बेला तर्नलाई बनाइएका झोलुङ्गे पुल पछिल्लो समय प्रयोगमा नआउने गरेको पाइएको छ ।
बाजुराको बूढीगंगा नगरपालिकामा पर्ने बाजुरा–अछाम जोड्ने इकडिगाडको पुल, बार्जुगाड र गुइगाड रहेका झोलुङ्गे पुल सडक निर्माणपछि प्रयोग गर्न छोडेको स्थानीयवासी तपेश रावलले बताए । साँफे मार्तडी सडक निर्माण नहुँदा आवतजावत गर्ने झोलुङ्गे पुलमा खिया लागेको छ ।
यस्तै, बडीमालिका नगरपालिकाको तिपाडीगाड, बूढीगंगा नदीको पुल र कोर्दालिगाडको पुलसमेत प्रयोगमा आउन छाडेका छन् । सडकका कारण झोलुङ्गे पुल प्रयोगमा नआएका हुन् । खिया लागेर पुल जीर्ण अवस्थामा छन् ।
करोडौँको लगानीमा निर्माण गरिएका पुल घाँसपात र गाई–गोरु चराउन जाने गोठालाले मात्र प्रयोग गर्ने गरेका छन् । घाँस काटेर वनपाखाबाट आउने जाने बाहेक अन्यले झोलुङ्गे पुल प्रयोग गर्न छोडेको बडिमालिका ६ का वडाध्यक्ष बलबहादुर थापाले बताए ।
सडक सञ्जाल जोडिएपछि जीर्ण बन्दै गएका पुलको मर्मतका लागि सम्बन्धित निकायले चासो नदेखाएको स्थानीयवासीले गुनासो गरेका छन् । पुल जीर्ण बन्दै गएपछि स्थानीयवासी चिन्तित छन् । जीर्ण बन्दै गएका जिल्लाका अधिकांश झोलुङ्गे पुल जीर्ण बन्दै गएकाले मर्मत–सम्भारका लागि आवश्यक बजेट विनियोजन गर्नुपर्ने देखिन्छ ।
जिल्ला समन्वय समितिका संयोजक नरेन्द्रकुमार रोकायाले झोलुङ्गे पुल मर्मत–सम्भारका लागि आवश्यक बजेट विनियोजनका लागि सम्बन्धित नगरपालिका र गाउँपालिकाका प्रमुख/अध्यक्षलाई निर्देशन दिएको बताए ।
रासस
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।