गण्डकी प्रदेशका मुख्यमन्त्री पृथ्वीसुब्बा गुरुङले अवैध रुपमा सञ्चालित क्रसर उद्योग बन्द गर्ने बताएका छन् ।
प्रेस सङ्गठन नेपाल गोरखाले आज सदरमुकाममा आयोजना गरेको पत्रकार सम्मेलनमा गुरुङले अवैध क्रसर उद्योग, ढुङ्ङगा गिटी र बालुवा उत्खनन् गर्न नदिइने दृढता व्यक्त गरे ।
‘‘क्रसर उधोग वा ढुङगागिटी बालुवाको व्यवस्थापन, नियमन गर्ने र कानून बनाउने काम प्रदेश सरकारको हो,’’ उनले भने, “हामीले बनाएका मापदण्ड पनि कुनै ठाउँका लागि अव्यावहारिक भएको हुनसक्छ त्यसलाई संशोधन गर्ने अवस्था गरेर अगाडि बढ्ने कुरा होे । त्यसलाई अझ व्यवस्थित गर्ने काम प्रदेश सरकारले गरिरहेको छ ।”
अझैपनि प्रदेशभित्र धेरै ठाउँमा अवैध रुपमा ढुङ्गा गिटीको उत्खनन गर्ने र क्रसर सञ्चालन गर्ने काम भइरहेको पाइएको उनको निष्कर्ष छ ।
गएको आर्थिक वर्षमा केही गञ्जागोल धेरै भएकाले नियमनका प्रक्रियामा कमी कमजोरी भएको भए पनि आगामी दिन अवैधानिक काम गर्न कसैलाई छुट नहुने मुख्यमन्त्री गुरुङले बताए ।
स्थानीय सरकारका लागि थोरै भए पनि राजश्व आउछ भनेर प्रदेश सरकारले उत्खननको अनुमति दिएको भए पनि कतिपय ठाउँमा मापदण्ड विपरीत उत्खननको काम भएको पाइएको पनि उनले खुलासा गरे ।
“प्रदेश कानून बमोजिम स्थानीय तहले त्यसको सङ्कलन गर्ने राजश्व उठाउने भनिएको हो,” उनले भने, “जथाभावी उत्खनन हँुदा त्यसले दीर्घकालीन असर पुग्छ भन्ने कुरा सोच्नु पर्छ ।” रासस
प्रतिक्रिया