सडक र पुल निर्माणका योजना अलपत्र

जेठ १४, लहान । डिभिजन सडक कार्यालयद्वारा सञ्चालित अधिकांश सडक तथा पुल निर्माणका योजनाहरु अलपत्र छन् । सिरहा, सप्तरी र उदयपुर जिल्लाका सडक तथा पुलका योजनाहरु सडक कार्यालयका कर्मचारी र ठेकेदार कम्पनीको लापरवाहीका कारण अलपत्र परेका हुन् ।

समयमै कारवाही नहुँदा ठेकेदार कम्पनीले ठेक्का लिएर पनि समयमा काम सम्पन्न नगर्ने र अलपत्र अवस्थामा छाड्ने प्रवृत्ति बढेको हो । आर्थिक बर्ष ०७४/७५ को जेठ महीनाभित्र सम्पन्न हुनुपर्ने ३२ भन्दा बढी सडक तथा पुल निर्माणका योजनाहरु अझै अलपत्र छन् । सिरहाको मिर्चैया–कटारी–घुर्मी सडकमा पुल तथा सडक निर्माणको अधिकांश कार्य २०७५ जेठ मसान्तमै सकिने सम्झौता भए पनि अहिलेसम्म पूरा हुन सकेको छैन ।

एक वर्षभित्र निर्माण गर्ने गरी बजरङ्गवली कन्सट्रक्शन प्रालिले उक्त सडक निर्माणको ठेक्का पाएको र हालसम्म करीब ४० प्रतिशत पनि काम पूरा नगरेको सडक कार्यालयका कर्मचारीले बताएका छन् । त्यसैगरी बलान कमला प्याच मर्मत, कोशी बलान सडकमा प्याच मर्मत लगायत कार्यसमेत अधुरै रहेको उक्त कार्यालयले जनाएको छ ।

यस्तै सप्तरीको कदमाहा–गाईघाट सडक मर्मत २०७५ असार २० गते नै सकिनुपर्नेमा अझै पूरा गरिएको छैन भने श्री ट्रस कन्सट्रक्शन प्रालिले ठेक्का लिएको सप्तरीको कोशी ब्यारेज–बलान सडकमा कलभर्ट तथा पुल निर्माण निर्माण पनि २०७५ असारमै सकिनुपर्नेमा अझै पूरा नभएको कार्यालयका प्रमुख विनोदकुमार साहले जानकारी दिए ।

सिरहाकै बहुनाखोलामा ‘कजवे प्रोटेक्शन’ निर्माण शुरु भएको तीन बर्षमा पनि पूरा गरिएको छैन । यसैगरी उदयपुरको गाईघाटस्थित फसैठ (वगाहा) खोलाको पुल निर्माणको काम २०७० सालमै निर्माण भइसक्नुपर्नेमा हालसम्म अलपत्र छ । उक्त पुल निर्माणको जिम्मा पाएको विपी÷बहादुर थिङ्ग जेभीले पुल निर्माणको काम अलपत्र छाडेको महालेखा परीक्षकको प्रतिवेदनमा समेत उल्लेख छ ।

सप्तरीको रुपनी कटैया सडकमा माटो ग्राभेल तथा कलर्भट निर्माण, मुतनीधारमा पुल निर्माण तथा सुमरी खोलामा पुल निर्माण, उदयपुरको तवा खोला पुल निर्माणको काम लामो समयदेखि अलपत्र छ । लामो समयसम्म सडक तथा पुल निर्माण योजना अलपत्र छाड्ने आठ निर्माण व्यवसायीमाथि कारवाही शुरु गरिएको जनाइएको छ ।

सप्तरीको गिदेरी खोला पुल र महुली घाडन खोला पुलको ठेक्का लिएको पप्पु मृत सञ्जीवनी जेभीलाई कारवाही गरी दुवै ठेक्काबाट दुई करोड १८ लाख ७० रकम फिर्ता गराएको छ भने सप्तरीको मुतनीखोला र सिरहाको सरस्वती खोलामा पुल निर्माणको ठेक्का लिएको रोशन कन्सट्रकशनबाट ५९ लाख ७० हजार फिर्ता गरिएको सो कार्यालयले जनाएको छ ।

सप्तरीको सुमन्दरी खोलामा पुल निर्माणको ठेक्का लिएको नीलगिरि निर्माण सेवा प्रालिबाट ४७ लाख ५० हजार फिर्ता गराइएको कार्यालय प्रमुख साहले बताए । त्यस्तै अन्य तीन वटा ठेक्काका ठेकेदारमाथि समेत कारवाही गरी रकम फिर्ताका लागि बैंकमा पत्र काटिएको र अन्य ठेकेदार कम्पनीमाथि पनि कारवाही शुरु गरिएको जनाइएको छ । रासस