विभिन्न गाउँपालिका जोड्ने सडकको स्तरोन्नति शुरु

वैशाख १५, बलेवा । बागलुङका विभिन्न गाउँपालिकालाई जोड्ने सडकको स्तरोन्नति गर्ने काम शुरु भएको छ । स्थानीय पूर्वाधार विकास साझेदारी कार्यक्रम अन्तर्गत बहुवर्षीय योजनामा यो सडक स्तरोन्नति गर्न लागिएको हो ।

चालू आर्थिक वर्षभित्र काम सक्नेगरी सङ्घीय सरकारको एक करोड र नगरपालिकाको भौतिक पूर्वाधार साझेदारी कार्यक्रमअन्तर्गत ३७ लाख गरी कूल एक करोड ३७ लाख बराबरको बजेटमा सडकको स्तरोन्नतिको काम थालिएको हो । हाल रहेको एकतर्फी सडक चौँडा गरेर आठ मिटर बनाएपछि दोहोरो गाडी गुड्न सक्ने बनाइनेछ ।

यो सडकमै यसै आर्थिक वर्षमा पक्की नाली र पर्खाल पनि बनाइनेछ । ग्रेड नमिलेका केही स्थानको २०० मिटर खण्डमा सडकलाई ढलान गरी सुधार गरिने ठेकेदार कम्पनी विके कन्सट्रक्सनका प्रमुख प्रकाश घर्तीमगरले बताए । यो सडकको स्तरोन्नतिपछि दक्षिण बागलुङका दर्जन बढी गाउँमा आवतजावत सहज हुने बागलुङ नगरपालिकाका प्रमुख जनकराज पौडेलले बताए । साँघुरो सडकका कारण अहिले यात्रुले कष्टपूर्ण यात्रा गर्न बाध्य छन् ।

तीन सहकारी एकीकृत

बागलुङ काठेखोला गाउँपालिका–२ भिमापोखरास्थित तीन वटा सहकारीलाई एकीकरण गरिइएको छ । गुँहेली सञ्चार सहकारी, सूर्यमुखी कृषि तथा पशु व्यवसायी सहकारी र सक्षम बचत ऋण सहकारी संस्थाको शनिबार सम्पन्न विशेष साधारणसभाले एकिकृत सहकारी संस्थाको नाम गुँहेली सञ्चार सहकारी रहने निर्णय गरेको हो ।

सहकारीको मर्मअनुसार उत्पादनमा केन्द्रित हुनेगरी तीन सहकारीका बीचमा एकीकरण भएको हो । एकीकृत सहकारीको कूल पूँजी ८९ लाख ९८ हजार ९२६ रहेको छ ।

साधारणसभाले भूमिश्वर उपाध्यायको अध्यक्षतामा नयाँ सञ्चालक समितिसमेत गठन गरेको छ । समितिको उपाध्यक्षमा सीता शर्मा, सचिवमा सूर्यबहादुर थापा, कोषाध्यक्षमा प्रसाद थापा, सहसचिवमा पार्वती शर्मा रहेका छन् ।

त्यस्तै सदस्यमा खिमबहादुर कार्की, ऋषिराम शर्मा, चित्रबहादुर कार्की, नवीन शिशिर, तारा थापा केसी र लक्ष्मी थापा रहेको सो सहकारी संस्थाले जनाएको छ । रासस