Logo

कार्यान्वयनमा आउन सकेन सिञ्जा गुरुयोजना



चैत ३, सिञ्जा । जुम्लाको सिञ्जा क्षेत्रलाई धार्मिक, ऐतिहासिक र पर्यटकीय क्षेत्रका रुपमा विकास गर्नका लागि तयार पारिएको गुरुयोजनाको कार्यान्वयनमा सम्बन्धित निकायको ध्यान जान सकेको छैन । यस क्षेत्रको समग्र विकासका लागि तयार गरिएको सो गुरुयोजनालाई बेवास्ता गरिएको स्थानीयवासीले गुनासो गरेका छन् ।

सिञ्जा क्षेत्रको विकासका लागि जुम्ला सामाजिक विकास केन्द्रले विसं २०६५ मा गुरुयोजना बनाएको थियो । दश वर्षे गुरुयोजनामा सिञ्जा क्षेत्रमा चार लेन सडक र तटबन्ध निर्माण गर्नेदेखि सङ्ग्रहालय निर्माण गरिने उल्लेख छ ।

पर्यटक बिरामी भएमा औषधि उपचारका लागि अस्पताल निर्माण, ओझेलमा परेका मठमन्दिर व्यवस्थापन, स्नातकोत्तर अध्ययन गर्ने कलेज स्थापना, सर्पदंशको उपचार सेवा सञ्चालन गर्ने, मठमन्दिरको संरक्षण गर्ने, पशु चौपायाको संरक्षण स्थल निर्माण गर्ने लगायतका पूर्वाधार निर्माणका विषय गुरुयोजनामा उल्लेख गरेको कनकासुन्दरी गाउँपालिका–४ का भक्तबहादुर बोगटीले बताए ।

गुरुयोजनाको कार्यान्वयन गराउन मन्त्रालय र सम्बन्धित कार्यालयमा पटक पटक माग गरेको र साविकको जिल्ला विकास समितिले समेत १० वर्षे योजना पारित गरिसक्दा पनि चासो नदिइएको जुम्ला सामाजिक विकास केन्द्रका अध्यक्ष तथा कनकासुन्दरी गाउँपालिका–४ का भक्तबहादुर बोगटीले गुनासो गरे । गुरुयोजनालाई तत्काल कार्यान्वयन गर्न सकिए सिञ्जा क्षेत्रको मात्र नभई समग्र जिल्लाको विकासमा बल पुग्ने उनको भनाइ छ ।

धार्मिक एवं पर्यटकीय महत्व बोकेको यस क्षेत्रमा कनकासुन्दरी मन्दिर, विराट दरबार, पाण्डफ गुफाको गरुड नुहाउने मन्दिर, वाणगङ्गा मन्दिरलाई पवित्र तीर्थस्थलको रुपमा लिने गरिन्छ । उचित संरक्षणको अभावमा यस क्षेत्रमा छरिएर बेवारिसे अवस्थाका रहेका ढुङ्गे खम्बा, देबल, मुग्राहा, प्राचीन बस्तीका भग्नावशेष देख्दा जो कसैलाई पनि दुखित बनाउँछ ।

सिञ्जामा बोलिने भाषा, त्यहाँको सभ्यता, त्यहाँका पर्यटकीय स्थल, धार्मिक स्थल, पुराना दरबार सङ्कटमा पर्दै गएका छन् । विराट दरबारको भग्नावशेष मात्रै भेटिन्छ ।

वडा भवन निर्माण

तिला गाउँपालिका–४ मा जिल्लाकै गुणस्तरीय नमूना भवन निर्माण भएको छ । यो भवन जिल्लाकै नमूनाको रुपमा निर्माण भएको स्थानीयवासी भद्रवीर सार्कीले बताए । वडा सचिव बिमला योगीले गाउँमा यस्तो भवनमा काम गर्न पाउँदा आफू निकै खुशी भएको बताइन् ।

भवन निर्माण सरकारको समन्वयमा सञ्चालित सामुदायिक विकास कार्यक्रमको सहयोगमा भएको हो । जिल्ला समन्वय समितिका प्रमुख लालबहादुर सार्की, तिला गाउँपालिकाका अध्यक्ष रतननाथ योगी, उपाध्यक्ष विष्णु बुढाले संयुक्त रुपमा यस भवनको उद्घाटन गरे ।

कार्यक्रममा जिल्ला समन्वय प्रमुख सार्कीले झण्डोत्तोलन गरे । उद्घाटन भएपछि शहीदको सम्मानमा मौनधारण पनि भयो । सामुदायिक विकास कार्यक्रमद्वारा एक करोड ९५ लाख ७८ हजार ४०३ र गाउँपालिकाको तर्फबाट तीन लाख ७० हजारको लागतमा यो भवन निर्माण गरिएको हो । रासस

प्रतिक्रिया दिनुहोस्