माघ २८, जाजरकोट । रोल्पाको रातामाटामा रहेको नेपाल टेलिकमको रिपिटर टावरमा चट्याङले क्षति गरेपछि जाजरकोटको टेलिफोन सेवा ४ दिनदेखि अवरुद्ध छ ।
समयमै मर्मत नहुँदा हजारौँ सेवाग्राही मर्कामा परेका छन् । रातामाटाको रिपिटर टावरले जाजरकोटमा सेवा प्रवाह गर्दै आएको छ । २ हप्ताअघि मछाइनामा रहेको टावरमा चट्याङ्ले क्षति बनाएपछि हप्ता दिन अवरुद्ध भएको थियो । फेरी टेलिफोन सेवा पूर्ण अवरुद्ध भएपछि यहाँका सेवाग्राही मर्कामा परेका हुन् ।
मछाइनमाको टावरले रुकुमको घेत्मा, जाजरकोट बारेकोट रतनकोट, नलगाड नगरपालिकाको गराइला लगायतका ५ ठाउँमा रहेका टावरलाई रिले गर्दै आएको थियो ।
रिपिटर टावरको चट्याङले त्यहाँ रहेको सोलार ब्याट्री, अन्य उपकरणमा क्षति पुगेको नेपाल टेलिकम जाजरकोटका प्रमुख लोकेन्द्र भण्डारीले जानकारी दिनए । नेपालगञ्जबाट प्राविधिक टोली काममा खटिए पनि टावर निर्माणको काम सफल नभएको भण्डारीले जानकारी दिए ।
टावरले काम नगर्दा जिल्ला सदरमुकाम र गाउँगाउँमा सम्पर्क टुटेको छ । मछाइनामा रहेको टावरमा बेलाबेलामा समस्या आउँदा यहाँका स्थानीयवासीले सास्ती भोग्दै आएका छन् ।
निजी क्षेत्रका सञ्चार प्रदायक कम्पनीको जाजरकोटका गाउँगाउँमा सेवा विस्तार नहुँदा नेपाल टेलिकमको सेवामा नै भरपर्नुपर्ने बाध्यता रहेको छ । रासस
प्रतिक्रिया