Logo

दशरथचन्द नगरपालिकाका प्रमुख थापाविरुद्धको रिट खारेज



माघ २१, बैतडी । दशरथचन्द नगरपालिकाका प्रमुख नरेन्द्रसिंह थापाविरुद्ध गरिएको रिट उच्च अदालत दीपायलको महेन्द्रनगर इजलासले आइतबार खारेज गरेको छ ।

अदालतका मुख्य न्यायाधीश पवनकुमार शर्माको एकल इजलासले रिट खारेज गरेको थापाका तर्फबाट बहसमा सहभागी अधिवक्ता गङ्गाराम पाध्यायले जानकारी दिए । रिट निवेदकले उल्लेख गरेका कुराको प्रमाण नपुगेकाले रिट खारेज भएको अदालत स्रोतले जनाएको छ ।

२०७४ असार १४ गते भएको नगर निर्वाचनको मतगणनामा धाँधली भएको भन्दै थापाविरुद्ध राष्ट्रिय प्रजातन्त्र पार्टीका उम्मेद्वार पुष्करराज जोशीले उच्च अदालतमा रिट दायर गरेका थिए ।

अदालतले मतगणना प्रक्रियागत भएको, मुचुल्का तथ्यका आधारमा भएको र निर्वाचन ऐन २०७३ को दफा ५२ अनुसार रिट निवेदन रीत नपुगेको भन्दै सो मुद्दा खारेज गरेको हो ।

दशरथचन्द नगरपालिकाका प्रमुख थापाले निर्वाचनमा ३ हजार ७६२ मत प्राप्त गरेका थिए भने उनका निकटतम प्रतिद्धन्द्धी जोशीले ३ हजार ७ सय मत प्राप्त गरेका थिए । जोशीले थापाविरुद्ध २०७४ असार २० गते मुद्दा दायर गरेका थिए । रासस

प्रतिक्रिया दिनुहोस्