Logo

जनप्रतिनिधि र नागरिकबीच पहिलो पटक सार्वजनिक प्रश्नोत्तर



माघ ८, परासी । “गाउँपालिका अध्यक्षज्यू, गाउँमा प्रसूतिगृह नहुँदा सुत्केरीलाई सदरमुकाम लैजानुपर्ने बाध्यता छ, गाउँका स्वास्थ्यचौकीमा औषधि पनि छैन, हामीले कहिले सुविधा पाउँछौँ ?” आफ्नो वडा कार्यालयमा आएका जनप्रतिनिधिलाई स्थानीयवासी विमलादेवी कर्णले प्रश्न गरिन् ।

“जनप्रतिनिधि भए पनि सरकारले मासिक भत्ता दिएको छ रे, तर वडा कार्यालयमा आउँदा प्रायः वडाध्यक्षज्यू भेटिनुहुन्न, वडाध्यक्ष भेट हुने समय कति बजे हो ?” अर्का स्थानीयवासी धुव्रनारायण बानियाँले सोधे ।

“भाषणमा युवालाई रोजगारी दिन्छौँ भन्ने धेरै सुनियो, तर रोजगारी भाषणमा मात्र हो अध्यक्षज्यू ? अनि गाउँपालिकामा कर बुझाउन जाँदा लाइन बस्नुपर्छ, गाउँगाउँमा सिंहदरबार आयो भन्नुहुन्छ, हामीलाई वडा कार्यालयबाटै कर तिर्ने सुविधा पनि छैन, कहिले आउँछ सिंहदरबार ?” स्थानीय युवा हिरालाल हरिजनको प्रश्न थियो ।

पश्चिम नवलपरासीको पाल्हीनन्दन गाउँपालिका २ हरपुरका नागरिकले सोमबार आफ्ना जनप्रतिनिधिसँग यसरी नै प्रत्यक्ष प्रश्नोत्तर गरे । जनप्रतिनिधि निर्वाचित भएपछि गाउँपालिकाले पहिलो पटक सार्वजनिक सुनुवाइ राखेर विकास निर्माण र सेवा प्रवाहको विषयमा नागरिकका गुनासा र सुझाव सुनेको थियो ।

रेडियो परासीको सहजीकरण र समन्वयमा यसरी सार्वजनिकरूपमा आफ्ना जनप्रतिनिधिलाई प्रश्न सोध्न पाएका स्थानीयवासीले वडादेखि गाउँपालिकासम्मको विकास निर्माण अनि समस्या पोखे । वडाभित्रका विभिन्न सडकको कालोपत्र हुनुपर्ने, सीमाक्षेत्र विकास कार्यक्रमलाई निरन्तरता दिनुपर्ने, सुविधासम्पन्न अस्पताल, वडा कार्यालयबाटै कर तिर्ने सुविधा हुनुपर्ने, झरही नदीमा तटबन्ध तथा बाढी नियन्त्रणको उपाय खोज्नुपर्ने उनीहरूको माग थियो ।

त्यसैगरी प्राविधिक शिक्षालय, प्रसूतिगृह स्थापना गर्नुपर्ने, स्वास्थ्य संस्थामा सहजरूपमा औषधि पाउने व्यवस्था गरिनुपर्ने, वडामा जनसङ्ख्या र भूगोलको आधारमा बजेट वितरण गर्नुपर्ने, कृषि क्षेत्रमा लगानी बढाउनुपर्ने लगायतका माग पनि स्थानीयवासीले राखेका थिए ।

गाउँपालिका अध्यक्ष बैजुप्रसाद गुप्ताले गाउँपालिकावासीलाई सुविधा दिन वडा नं ४ मा रहेको पाल्ही प्राथमिक स्वास्थ केन्द्रको स्तरन्नोति गरी १५ शैयाको अस्पताल बनाउन गाउँपालिकाले पहल गरेको जानकारी दिए । तीन महीनाभित्र प्रत्येक वडाबाटै कर सङ्कलनको व्यवस्था गर्ने प्रतिबद्धता पनि व्यक्त गर्दै उनले भने, “सबैको सल्लाह, सुझाव र सहयोगबाटै गाउँपालिकालाई समृद्ध र नमूना बनाउन म लागिरहेको छु ।”

प्रमुख प्रशासकीय अधिकृत दुर्गा पौडेलले हालसम्म ३३ प्रतिशत बजेट खर्च भइसकेको र ४० योजना सम्झौता भएर कार्यान्वयनमा रहेको जानकारी दिए । उनले जनसङ्ख्या र राजश्व सङ्कलनका आधारमा वडालाई बजेट विनियोजन गरिएको उल्लेख गर्दै गाउँपालिका भवन र वडा कार्यालयको भवन बनाउने कामलाई तीव्रता दिएको पनि जानकारी दिए । योजना कार्यान्वयन असारको बेला चाप नहुने गरी अहिलेदेखि नै कार्यान्वयन गरिरहेको गाउँपालिकाले जनाएको छ ।

यस वर्ष पश्चिम नवलपरासीमा पाल्हीनन्दन गाउँपालिकाले मात्रै यसरी सार्वजनिक सुनुवाइ गरेको छ । सात स्थानीय तह रहेको यस जिल्लाका अन्य स्थानीय तहमा पनि सार्वजनिक सुनुवाइको तयारी भइरहेको पाइएको छ । रासस

प्रतिक्रिया दिनुहोस्