१४ मंसिर २०७९, बुधबार | Wed Nov 30 2022

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

अनाधिकृत प्लटिङमा गोदावरी नगरपालिकाको आकस्मिक अनुगमन



स्थानीय खबर संवाददाता

पुस २७, ललितपुर । गोदावरी नगरपालिकाले अनाधिकृत रुपमा भइरहेको प्लटिङको आकस्मिक अनुगमन गरेको छ । स्थानीयबासीको उजुरी पछि नगरपालिकाले वडा नं. १० मा भइरहेको प्लटिङको अनुगमन गरेको थियो ।

नगरपालिकाका प्रमुख गजेन्द्र महर्जनको नेतृत्वमा प्रमुख प्रशासकिय अधिकृत कृष्णप्रसाद जैसी र महानगरिय प्रहरी वृत चापागाँउका प्रहरी नायव उपरिक्षक राजकुमार खिउजु सहितको टोलीले बिहीबार दिउँसो अनुगमन गरेको थियो ।

आकस्मिक रुपमा अनुगमन गर्दा पनि डोजर र काम गर्ने ब्यक्तिहरू भने भेटिएनन् । प्लटिङ गर्ने ठाउँमा डोजरले खनेको स्पष्टै देखिन्थ्यो । स्थानीय युवाहरू नामबाट प्राप्त उजुरीका आधारमा अनुगमन गरिएको नगरपालिकाका प्रमुख महर्जनले जानकारी दिए ।

नगरपालिकाबाट स्वीकृति नलिइ प्लटिङ गरिएकाले त्यस क्षेत्रमा बन्ने भवन तथा संरचनालाई नक्सापास लगायतका कामहरूको स्वीकृति नदिने प्रमुख प्रशासकीय अधिकृत जैसीले स्पष्ट पारे ।

नगरपालिकाबाट अनुमति नलिई प्राकृतिक स्रोत साधनको दोहन गरे पनि चूप बसेको भन्दै स्थानीयबासीप्रति जैसीको गुनासो थियो । राजनीतिक शक्तिको आडमा अनाधिकृत प्लटिङमा नगरपालिकाकै मिलेमतो रहेको आरोप लगाउँदै आफूहरू चूप रहन बाध्य भएको एक स्थानीयले बताए ।

वडा नं. १० का अध्यक्ष दर्शनकुमार बिष्टले स्थानीय चुनावअघि भइसकेको अनाधिकृत प्लटिङलाई कारवाहीको दायरमा ल्याउन गाह्रो भएको बताए । उजुरी आए सम्बन्धित निकायहरूसँग समन्वय गरेर कारवाही गर्ने बिष्टले बताए ।

प्रकाशित मिति : २७ पुस २०७५, शुक्रबार ००:००