Logo

भरतपुर महानगरका जनप्रतिनिधिलाई आचारसंहिता



पुस ८, चितवन । भरतपुर महानगरपालिकाले जनप्रतिनिधिहरूको आचारसंहिता, २०७५ तयार पारेको छ । स्थानीय राजपत्रमा प्रकाशित गरेपछि लागू हुने महानगरले जनाएको छ ।

शनिबार सम्पन्न महानगरको कार्यपालिका बैठकले आचारसंहिता अनुमोदन गरेको छ । नगरसभाबाट अनुमोदन भएपछि राजपत्रमा प्रकाशित गरी कार्यान्वयनमा आउने महानगरका कानून अधिकृत खगेश्वर अधिकारीले जानकारी दिए ।

मुलुकको संघीय लोकतान्त्रिक गणतन्त्रात्मक संविधान र प्रचलित कानूनप्रति प्रतिबद्ध राखेर जनताको सेवा गर्ने उद्देश्यले आचारसंहिता ल्याइएको महानगरका प्रमुख रेणु दहालले बताईन् ।

साथै, जनप्रतिनिधहरूको मर्यादा, व्यवहारलाई शिष्ट बनाउन आचारसंहिता निर्माण गरिएको दहालको दाबी छ ।

जनप्रतिनिधिहरूले कानूनले तोकेबमोजिमको कुनै काम गर्दा कसैबाट आर्थिक प्रलोभनमा परी कुनै प्रकारको दान, दातव्य, कोशेली, उपहार आफूले स्वीकार गर्ने वा आफ्नो परिवारको कुनै सदस्यलाई स्वीकार गर्न दिन नहुने आचारसंहितामा उल्लेख छ । तर कुनै ठाउँ विशेषको पहिचान झल्किने खालको उपहार लिन सकिने व्यवस्था गरिएको छ ।

सार्वजनिक हितका लागिबाहेक कार्यपालिकाको स्वीकृतिबिना कुनै कामका निम्ति कुनै किसिमको सहयोग माग्न वा त्यस्तो चन्दा स्वीकार गर्न वा कुनै किसिमको आर्थिक सहायता लिन नपाइने आचारसंहितामा उल्लेख छ ।

आफ्नो वा आफ्नो एकाघरको परिवारको कुनै सदस्यको नाममा जुनसुकै स्रोतबाट अचल सम्पत्ति खरीद गरेमा लागत मूल्यसमेतको जानकारी महानगरपालिकामा पेश गर्नुपन व्यवस्था पनि संहितामा छ ।

महानगरपालिकाले प्रकाशित गरेको सूचनाअनुसार गरिने कुनै पनि कामको खरीद प्रक्रिया (ठेक्का, बोलपत्र) मा आफ्नो वा एकाघर परिवारको कुनै सदस्यको नाममा सहभागी हुन पाउने छैनन् ।

सार्वजनिकस्थल तथा खुला ठाउँमा कुनै किसिमको पासा, जुवा, तास, चिठ्ठा खेल्ने, बाजी लगाउने आदि जस्ता कार्य गर्न महानगरले रोक लगाएको छ । महानगरपालिकाको स्वीकृतबिना कुनै बैंक वा कम्पनीको स्थापना, रजिस्ट्रेशन वा सञ्चालनको काममा भाग लिनसमेत नपाउने आचारसंहितमा उल्लेख छ ।

महानगरपलिकाबाट स्वीकृत नलिई अख्तियारी नभई आफूले लेखेको वा प्राप्त गरेको कुनै कागजातपत्र वा सूचनालाई प्रत्यक्ष वा अप्रत्यक्ष रूपबाट महानगरपालिकाको प्रतिकूल हुनेगरी अनाधिकृत व्यक्ति वा कसैलाई सूचना गर्न नपाइने व्यवस्था पनि छ ।

महानगरपालिकाको दैनिक काम कारवाहीमा प्रतिकूल प्रभाव पर्ने वा कसैको व्यक्तिगत मानमर्दन हुनेगरी कुनै पत्रपत्रिकामा आफ्नो वास्तविक वा काल्पनिक नामबाट वा बेनामी कुनै लेख प्रकाशन वा रेडियो वा टेलिभिजन तथा समाजिक सञ्जालमार्फत प्रसारण गर्न रोक लगाइएको छ ।

कार्यालय समय वा पदीय कामका सिलसिलामा मादक पदार्थको सेवन गर्न पाइने छैन । कार्यालय हाताभित्र तथा सार्वजनिक सभा, समारोह, बैठक आदि स्थलहरूमा मद्यपान, धुम्रपान, खैनी, सुर्ती, गुट्खा वा पान सेवन गर्न नपाइने आचारसंहितामा जनाइएको छ ।

महानगरपालिकाका उपप्रमुख पार्वती शाहका अनुसार आचारसंहिताको अनुगमनको समेत व्यवस्था गरिएको छ । उनका अनुसार उपप्रमुख तथा कार्यपालिकाका सदस्यहरूले आचारसंहिताको पूर्णरूपमा परिपालना गरे नगरेको सम्बन्धमा नगरप्रमुखले अनुगमन गरी सम्बन्धित जनप्रतिनिधिलाई आचारसंहिता पालन गर्न निर्देशन दिन सक्नेछ ।

वडा समितिका सदस्यहरूको वडाध्यक्षले अनुगमन गरी आचारसंहिता पालन गर्न निर्देशन दिनसक्ने व्यवस्था गरिएको छ । नगरप्रमुखले आचारसंहिता पालन गरे नगरेको सम्बन्धमा कार्यपालिकाले अनुगमन गरी नगरसभामा प्रतिवेदन पेश गर्नेछ । साथै, आचारसंहिता पालन गराउन नगरसभाले निर्देश गर्न सक्नेछ । रासस

प्रतिक्रिया दिनुहोस्