व्यावसायिक कफी खेती सुरू

कृष्ण न्यौपाने

असोज ६, दमौली तनहुँको देवघाट गाउँपालिका–३ छिपछिपेका कृषकले व्यावसायिक रूपमा कफीखेती सुरू गरेका छन् । जिल्लाको अतिविकट कछार क्षेत्र मानिने छिपछिपेका कृषकले ५० रोपनी क्षेत्रफलमा कफी खेती सुरू गरेका हुन् ।

यस ठाउँका कृषकले सुन्तलाखेती समेत गर्दै आएका छन् । अन्य खेती नहुने भएपछि यहाँका कृषकले सुन्तलासँगै व्यावसायिक रूपमा कफीखेती सुरू गरिएको स्थानीय कृषक मिनबहादुर रानाले जानकारी दिए ।

“०५२/५३ मा स्थानीय कृषक लिलबहादुर गुरुङले कफीको परीक्षण उत्पादन गर्दा हावापानी उपयुक्त भएको पाएपछि अहिले आएर उहाँको सिको यहाँका कृषकले गरेका हुन्”, रानाले भन्ने ।

त्यसयता उत्पादन गरेको कफीले बजार नपाएका कारण कफीखेतीमा कमी आए पनि विसं २०७१/७२ देखि भने कफीको राम्रो माग रहेको छ ।
अहिले यस ठाउँका २७ कृषकले कफीखेती सुरू ्गरेका छन् । बालकेश आधारभूत विद्यालयमा प्रधानाध्यापकसमेत रहनुभएका कफी कृषक आशकुमार गुरुङले आर्थिक रूपमा सवल बन्न कफीखेती सुरू गरिएको बताए ।

“शिक्षण पेशा छाडेपछि पूर्णरूपमा यही खेतीमा आबद्ध हुनेछु”, उनले भने, “छिपछिपेलाई कफी र सुन्तलाको पकेटक्षेत्र बनाउने सोच छ ।”

समूहका अध्यक्ष तुलबहादुर गुरुङका अनुसार छिपछिपेबाट गत आर्थिक बर्षमा प्रतिकिलो ५ सय रुपैयाँका दरले ६ क्विन्टल कफी बिक्री भएको थियो ।

कृषकले उत्पादन गरेको कफी तनहुँ कफी व्यवसायी संघलाई बिक्री गर्ने व्यवस्था मिलाइएको छ । यहाँ उत्पादित कफी अमेरिका, जापान, जर्मनलगायतका युरोपियन देशमा निर्यात हुने गरेको छ ।

अर्गानिक पद्धतिबाट गरिएको कफीको विदेशमा राम्रो माग रहेको छ । मङ्सिरदेखि फागुनसम्म कफी टिप्न शुरु गरिने र वैशाख जेठमा बिक्री हुने गर्दछ । रासस