Logo

मध्यपुरथिमी नगरपालिकाको नीति तथा कार्यक्रम सार्वजनिक



६ असार, भक्तपुर । मध्यपुर थिमी नगरपालिकाले आगामी आर्थिक वर्षलाई ‘बजेट कार्यान्वयन विशेष वर्ष’ को रुपमा मनाउने गरी नीति तथा कार्यक्रम सार्वजनिक गरेको छ ।

‘हाम्रो कला, हाम्रो संस्कृति मध्यपुर थिमी हाम्रो सम्पत्ति’ भन्ने नाराका साथ कला, सम्पदाको संरक्षणमा नगरपालिकाले विशेष योजनाहरू ल्याएको छ ।

नगरपालिकाले कला, संस्कृतिलाई एकीकृत गरी निर्धारित क्षेत्रमा जीवित र सांस्कृतिक संग्रहालय निर्माण गर्ने तथा होमस्टेसमेत प्रवर्धन गर्ने नगरपालिकाका प्रमुख मदनसुन्दर श्रेष्ठले बताए ।

यसैगरी नगर क्षेत्रको वृहत एकीकृत गुरुयोजना, खानेपानी, नगर सडक र ढल निकास सञ्जाल, साँस्कृतिक तथा ऐतिहासिक सम्पदाहरुको पुनःनिर्माण, साँस्कृतिक एवं सम्पदायुक्त बस्तीको संरक्षणलाई उच्च प्राथमिकतामा राखेर नीति तथा कार्यक्रम ल्याइएको छ ।

नगरपालिकाको प्रशासनिक तथा वडा कार्यालय भवन निर्माण र नगर क्षेत्रका पाँचवटा स्थानमा बहुसाँस्कृतिक एवं ऐतिहासिक प्रवेशद्वार निर्माण गरिने छ । निर्माण हुने सम्पूर्ण भवन संरचना अपांग र बालमैत्री हुने नीति तथा कार्यक्रममा उल्लेख छ ।

बस्ती विकासका लागि जग्गा एकीकरण आयोजना सञ्चालन गर्ने तथा भइरहेको एकीकरणको स्वामित्व नगरपालिकाले लिँदै व्यवस्थित गर्न आयोजना सञ्चालन तथा व्यवस्थापन कार्यविधि स्वीकृत गरिने पनि कार्यक्रममा उल्लेख छ ।

नक्सा पास प्रक्रियालाई सहज, सरल, वैज्ञानिक र पारदर्शी बनाउन आगामी साउन १ गतेदेखि विद्युतीय भवन आचारसंहिता लागू गर्ने जनाएको छ ।

नगरपालिकाको स्वीकृतिबिना कुनै पनि संचरना बनाए भत्काइने नीतिलाई कडाइका साथ लागू गर्ने र सार्वजनिक जग्गा संरक्षण गर्ने लक्ष्य राखेको नगरपालिकाका प्रशासकीय अधिकृत कमल ज्ञवालीले जानकारी दिनुभयो ।

नीति तथा कार्यक्रममा खानेपानीलाई सुधार गर्ने, नगर क्षेत्रमा खानेपानीका लागि ८ इन्चको पाइप बिछ्याउने, फोहोरलाई व्यवस्थित गरिने, मनोहरा र हनुमन्ते नदीलाई ‘सफा नदी सभ्य सहर’ कार्यक्रमबाट सफा गर्दै हरियाली बनाउने, सबै वडामा ढलको व्यवस्थापन गरिनेछ ।

नगरपालिकाले आर्थिक विकासका लागि राजश्व सुधार कार्ययोजना अघि सारेको ज्ञवालीले बताए । साथै मध्यपुर उज्यालो कार्यक्रमलाई प्रभावकारी बनाउने र महत्वपूर्ण स्थानमा सिसी क्यामरा जडान गरिने पनि उनले जानकारी दिए ।

नगरपालिकाका प्रत्येक वडामा एक वडा एक स्वास्थ्य संस्था स्थापना गर्ने, शिक्षामा गुणस्तरियता र पहुँचमा समानता गरी विभेद्कारी शिक्षाको अन्त्य गर्ने, छात्रवृत्तिलाई प्रभावकारी बनाउने, स्वास्थ्यका लागि खेलकूद, राष्ट्रका लागि खेलकूद भन्ने नाराका साथ खेलकूदको विकास गर्नेसमेत नीति तथा कार्यक्रममा उल्लेख छ । रासस

प्रतिक्रिया दिनुहोस्