राजधानीका नगरपालिकाहरूले संयुक्त रुपमा सवारी कर उठाउने

राजधानीका नगरपालिकाहरूले संयुक्त रुपमा एकीकृत कर संकलन गर्ने निर्णय गरेका छन् । कर संकलन गर्न ललितपुर उपमहानगरपालिकाका कार्यकारी अधिकृत भरतमणि पाण्डेको संयोजकत्व व्यवस्थापन समिति गठन भएको छ । काठमाडौं महानगरपालिकाका राजश्व महाशाखा प्रमुख ध्रुब काफ्लेका अनुसार व्यवस्थापन समितिमा सबै नगरपालिकाको प्रतिनिधित्व रहनेछ । उनका अनुसार सबै नगरपालिकाका राजश्व महाशाखा प्रमुखहरू समितिमा रहनेछन् ।

“जस्तो भक्तपुरको यातायात कार्यालयमा नगरपालिकाले कर्मचारी राख्नेछन् । उसले उपत्यकाका जुनसुकै नगरपालिकाका सेवाग्राहीको सवारी कर संकलन गर्नेछन्,” उनले भने, “भक्तपूरले हाम्रो उठाउला, हामीले पनि भक्तपुरको उठाउँला ! प्रत्येक महिना समितिको बैठकले उपत्यकाको २२ नगरपालिकाबीच राजश्व बाँडफाँट हुनेछ ।” सवारी कर उठाउन ट्राफिक कार्यालय र ट्राफिकसँग पनि समन्वय भइरहेको बताए । दर्ता, नवीकरण, किनबेच वा फाईनान्स गर्दा नगरपालिकाको कर क्लियरेन्स भएपछि मात्रै यातायात कार्यालयले काम गर्नेछ । कर क्लियरेन्स नभए कर तिराउनेछ ।

साथै, ट्राफिकले पनि ब्लू बुक जाँच गर्दा नगरपालिकालाई सवारी कर तिरे÷नतिरेको हेर्नेछन् । नतिरेको भए तिराउने काफ्लेले बताए । “विगतमै पनि ट्राफिक र यातायात कार्यालयसँग आपसी समन्वयमा कर उठाउने सहमति भएको थियो, विविध कारणले ढिलाई भयो,” उनले भने, “अहिले पनि ट्राफिक र यातायात कार्यालयका अधिकारीहरू सकरात्मक हुनुहुन्छ । यसले सवारी कर छलीलाई पनि निरुत्साहित गराउनेछ ।”

सवारी कर संकलनले पुराना सवारी साधन विस्थापन गर्न पनि सहयोग पुग्ने काफ्ले बताए । सरकारले वातावरणीय प्रदुषणका कारण १२ बर्षभन्दा पुराना सवारी साधन हटाउन लागिएको उनले बताए । कर संकलनका क्रममा पुराना सवारी साधन पहिचान हुने भएकाले पनि सरकारलाई सझिलो हुने उनको निर्ष्कष छ । दर्ता, नवीकरणललगायतका कर दस्तुर यातायात कार्यालयलाई तिर्नु पर्ने भएपनि सडक मर्मत सम्भार नगरपालिकाले गर्नुपर्ने भएकाले नगरपालिकाले सवारी कर लिएको उनले बताए ।