Logo

‘एक नेपाली एक फलफूल’ अभियानमा २९ लाख बिरुवा रोपिए



 

शरद शर्मा
मंसिर १७ काठमाडौं

‘एक नेपाली एक फलफूल’ को बिरुवा रोपण अभियानअन्तर्गत करिबब २९ लाख फलफूलका बोटबिरुवा रोपिएका छन् ।

देशलाई फलफूलमा आत्मनिर्भर बनाउन सञ्चालन गरिएको अभियानमा गत जेठदेखि भदौसम्म सरकारले बिरुवा रोप्ने अभियान नै सञ्चालन गरेको थियो ।

उक्त अभियानका क्रममा २८ लाख ९० हजार ९१९ विभिन्न जातका फलफूल सहितका बिरुवा रोपिएको प्रधानमन्त्री तथा मन्त्रिपरिषद् कार्यालयका प्रवक्ता विनोदबहादुर कुँवरले बताए । ।

प्रधानमन्त्री केपी शर्मा ओलीले विश्ववातारण दिवसका अवसरमा गत जेठ २२ गते सिंहदरबारमा एभोकाडो र लिची रोपेर अभियानको शुरुआत गरेका थिए ।

अभियानका क्रममा सबभन्दा बढी कागती ५ लाख चार हजार ४९४ र कम भुइँकटहर पाँच वटा मात्र रोपिएका छन् । कागतीपछि अलैँची ४र लाख ६९ हजार १५०, सुन्तला ३ लाख ३९ हजार ८३८, आँप २ लाख ५९ हजार ३६५, लिची ८८ हजार ६३४ र अलैँची ४६ हजार ९१५ फलफूलका बिरुवा रोपिएका छन् ।

यस्तै अञ्जिर ३५, खुरपानी ८६८, आरुबखडा ९७२ र जापानी कटुस एक हजार २८० रोपिएका छन् । रोपिएकामध्ये अन्य फलफूल ३ लाख ५४ हजार ९३२ र विभिन्न बिरुवा पाँच लाख ७४ हजार १८० रहेका छन् । सबभन्दा बढी गण्डकी प्रदेशमा ९ लाख ४३ हजार १३७, प्रदेश नं ५ मा ६ लाख ५८ हजार ८४३, प्रदेश नं ३ मा तीन लाख ६७ हजार ६८७ फलफूल र कर्णाली प्रदेशमा तीन लाख ३६ हजार ५७४ बिरुवा रोपिएका छन् ।

यस्तै सबभन्दा कम प्रदेश नं २ मा एक लाख ७१ हजार १९६, प्रदेश नं ७ मा दुई लाख तीन हजार २६६ र प्रदेश नं १ मा दुई लाख १० हजार २२९ बिरुवा रोपिएका छन् । अभियानअन्तर्गत नेपाली सेनाले ४१ हजार ७८१, नेपाल प्रहरीले ३४ हजार १०३, सशस्त्र प्रहरी बलले २४ हजार ७३७ र बंैक वित्तीय संस्था एवम् सार्वजनिक संस्थानले २५ हजार ४०० बिरुवा रोपेका छन् ।

मन्त्रिपरिषद् कार्यालयका शाखा अधिकृत झवीन्दप्रसाद पाण्डेयले सबभन्दा धेरै बिरुवा रोप्ने लमजुङ जिल्ला उत्कृष्ट भएको बताए । उनका अनुसार लमजुङमा ४ लाख ९ हजार ९१६ बिरुवा रोपेको छ । लमजुङपछि रोल्पामा २ लाख १३ हजार ५१५, पर्वतमा १ लाख ७० हजार ९७२, कास्कीमा १ लाख ३२ हजार ८५ र उदयपुरमा १ लाख आठ हजार ४४६ बिरुवा रोपिएका छन् । बैतडीमा सबभन्दा कम १८० वटा मात्र फलफूलको बिरुवा रोपिएका छन् ।

यसैगरि सल्यानले ३ सय १५ वटा मात्र बिरुवा रोपेको छ । मन्त्रिपरिषद् कार्यालयले उत्कृष्ट बिरुवा रोप्ने पाँच जिल्लालाई पुरस्कृतसमेत गर्ने भएको छ ।

स्थानीय तहतर्फ उत्कृष्ट हुनेमा गाउँपालिकामा कास्कीस्थित अन्नपूर्ण गाउँपालिका र रुपन्देहीको तिलोत्तमा नगरपालिका रहेका छन् । अन्नपूर्ण गाउँपालिकाले ६३ हजार ९५० बोटबिरुवा, तिलोत्तमा नगरपालिकाले २७ हजार ७०० बिरुवा रोपेका छन् । तिलोत्तमा नगरपालिकाले नगरभित्रका जन्मिएका मानिसलाई जन्मदिनका अवसरमा बोटबिरुवा रोप्ने अभियान सञ्चालन गरेको छ ।

स्याङ्जाको कालीगण्डकी नगरपालिकाले आफ्नो नगरलाई कागतीमय बनाउने अभियानमा लागेको शाखा अधिकृत पाण्डेयले बताए । कालीगण्डकीले २० हजार कागतीका बिरुवा रोपेको छ ।

रोपिएका बिरुवाको संरक्षण कृषि विकास मन्त्रालय, वन तथा वातारण मन्त्रालय र सम्बन्धित स्थानीय तहलाई जिम्मेवारी दिइएको उनले बताए ।

मन्त्रिपरिषद्को कार्यालयले हिउँद महीनामा रोपिएका बिरुवाको विवरण वैशाखमा पठाउन निर्देशन दिएको छ । अभियानअन्तर्गत अहिले हिउँद महीनामा हुने फलफूलका बिरुवा रोपिरहेका छन् । सरकारले तीन वर्षभित्रमा फलफूलमा आत्मनिर्भर बनाउने अभियानका साथ ‘एक नेपाली एक फलफूल’ अभियान सञ्चालन गरेको हो । रासस

प्रतिक्रिया दिनुहोस्